Komisioni i posaçëm parlamentar për reformën në drejtësi mblidhet të hënën ora 10:00, pa praninë e mediave, për të zyrtarizuar qëndrimin ndaj draftit final të ekspertëve ndërkombëtarë për ndryshimet kushtetuese. Kreu i këtij komisioni Fatmir Xhafaj tha javën e kaluar se mbledhjen e kësaj të hëne drafti do të miratohej në parim, e më pas do të vijohej me miratimin e tij nen për nen, por PD mendon ndryshe. Opozita kërkon që drafti të lexohet nen per nen dhe më pas të miratohet në parim, pasi sipas saj ka ende pika të diskutueshme e për tu zgjidhur.
Të dielën pasdite, Partia Demokratike përmes një materiali disa faqesh, paraqiti konsideratat të përgjithshme mbi projektin e amendamenteve të kushtetuese.
Materiali, pas një sërë komentesh mbi projektin kushtetues, në përfundim të tij jep qëndrimin zyrtar të PD-së, që ‘në parim është ‘pro’ ndërhyrjeve dhe përmirësimeve të bëra nga ekspertët e EURALIUS dhe OPDAT në draftin kushtetues, me shpresën se edhe mazhoranca ndan të njëjtin vullnet me opozitën parlamentare, për ta çuar përpara realizimin e ‘Reformës në Drejtësi’.
Të mërkurën maxhoranca u shpreh në mbështetje të plotë të draftit të ekspertëve, ndërsa opozita kërkoi më shume kohë për shqyrtimin e tij. Javanews/ a.k
