Komisioni Qendror i Zgjedhjeve ka bërë thirrje për shtyrjen e afatit të vlefshmërisë së dokumenteve të identifikimit për zgjedhësit që jetojnë jashtë Shqipërisë deri më 30 maj 2025.
Ky propozim vjen si pasojë e një problematike të evidentuar gjatë procesit të regjistrimit të votuesve nga jashtë për zgjedhjet parlamentare të datës 11 maj 2025, sipas letrës së drejtuar nga kreu i KQZ, Ilirjan Celibashi drejt partive kryesore politike.
Sipas të dhënave të KQZ-së, aktualisht ka 600,248 zgjedhës të pajisur me dokumente të identifikimit të pavlefshme, ndërsa rreth 900 shtetas të regjistruar në Platformën Elektronike të Regjistrimit (PER) nga jashtë nuk kanë dokumente të vlefshme për të votuar.
Në një njoftim drejtuar partive politike dhe organizatave të shoqërisë civile, Komisioneri Shtetëror i Zgjedhjeve, Ilirjan Celibashi, thekson rëndësinë e votimit nga jashtë dhe nevojën për të adresuar këtë problematikë. Celibashi ka apeluar për zgjidhje të menjëhershme, duke theksuar se pamundësia për t’u pajisur me dokumente të vlefshme brenda afateve ligjore mund të cenojë të drejtën e votës për një numër të konsiderueshëm zgjedhësish.
Shkresa e plotë:
Lënda: Mbi shtyrjen e afatit të vlefshmërisë së dokumenteve të identifikimit
Drejtuar: Këshillit të Ministrave
Për Dijeni: Partisë Socialiste të Shqipërisë
Partisë Demokratike
Partisë së Lirisë
Partisë Socialdemokrate
Partisë Republikane
Partisë Agrare Ambientaliste
Partisë për Drejtësi Integritet dhe Unitet
Partisë Bashkimi për të Drejtat e Njeriut
Lëvizjes për Zhvillim Kombëtar
Të nderuar,
Prej datës 11 janar 2025 ka filluar procesi i regjistrimit të votuesve nga jashtë, nëpërmjet Platformës Elektronike të Regjistrimit të Komisionit Qendror të Zgjedhjeve (PER). Ky proces do të përfundojë në datën 4 mars 2025.
Në takimet konsultative që KQZ ka organizuar përgjatë kësaj periudhe me përfaqësues të partive politike, si dhe me organizatat e shoqërisë civile me fushë veprimi brenda dhe jashtë vendit, është sjellë në vëmendje në mënyrë të përsëritur çështja lidhur me vlefshmërinë e dokumenteve të identifikimit.
Kjo problematikë është konstatuar tek një numër i konsiderueshëm i zgjedhësve brenda dhe jashtë vendit dhe kërkon zgjidhje të menjëhershme në kuadër të mbarëvajtjes së procesit të votimit për zgjedhjet për Kuvend të datës 11 maj 2025.
Nga informacionet që KQZ ka marrë pranë Ministrisë së Brendshme dhe kompanisë së prodhimit të dokumenteve biometrike, aktualisht, rezultojnë të jenë 600 248 zgjedhës të pajisur me dokument identifikimi të pavlefshëm.
Nga të dhënat e siguruara nga PER, rezulton të jenë regjistruar rreth 900 (nëntëqind) zgjedhës nga jashtë të cilët nuk zotërojnë një dokument identifikimit të vlefshëm.
Për sa më lart, bazuar në rëndësinë që ka votimi nga jashtë si dhe pamundësisë objektive të zgjedhësve jashtë vendit për t’u pajisur brenda afateve ligjore me dokument identifikimi të vlefshëm në kuadër të ushtrimit të të drejtës së votës, KQZ propozon marrjen në konsideratë të shtyrjes së afatit të vlefshmërisë së dokumenteve të identifikimit për zgjedhësit me vendqendrim jashtë territorit të Republikës së Shqipërisë, deri në 30 maj 2025.
Duke ju falënderuar për bashkëpunimin,
Me konsideratë,
Ilirjan Celibashi
