Prej gjashtë vjetësh në depot e Qeverisë së Kosovës qëndrojnë 4 mijë e 697 kopje librash që i dedikohen veprës së humanistes shqiptare me nam botëror, Nënë Tereza. Ato ishin shtypur në vitin 2010.
Asokohe ishte planifikuar që librat të shpërndaheshin gjatë ngjarjeve dhe aktiviteteve kushtuar “100-vjetorit të lindjes së Nënës Terezë”. Ishte planifikuar që librat e shtypur në gjuhën angleze të shpërndaheshin edhe në ambasadat e Kosovës nëpër botë, shkruan sot “Koha Ditore”.
Qeveria e Kosovës kishte ndarë 180 mijë euro për më shumë se 20 aktivitete që ishin mbajtur në 100-vjetorin e lindjes së nobelistes shqiptare, e cila sivjet do të shenjtërohet. Aktualisht në depot e Qeverisë së Kosovës në Graçanicë zënë vend 100 kopje të librit “Nënë Tereza – Dashuria në veprim” me autor Don Lush Gjergjin, 720 kopje të librit “Nënë Tereza – Shenjtëria e dashurisë” me të njëjtin autor, 62 kopje të “Nënë Tereza në tri shpalime” me autor Anton Nikë Berishën, 660 kopje të librit “Jeta dhe vepra e Nënë Terezës”- vepër e Institutit të Historisë “Ali Hadri”.
