Qeveria ka dorëzuar në Kuvend projektligjin për ratifikimin e marrëveshjes mes Shqipërisë dhe Aleancës Gavi për pjesëmarrjen në strukturën globale të qasjes në vaksinat Covax. Synimi i këtij projektligji është blerja e vaksinave.
“Ratifikimin e marrëveshjes së angazhimit, ndёrmjet Këshillit të Ministrave të Republikës së Shqipërisë, përfaqësuar nga Ministria e Shëndetësisë dhe Mbrojtjes Sociale, dhe Aleancës GAVI, për pjesëmarrjen në strukturën globale të qasjes në vaksinat COVID-19 (Covax Facility), sipas tekstit që i bashkëlidhet këtij ligji”, thuhet në projektligjin që është dërguar në Kuvend.
Në këtë program janë të përfshira aktualisht 80 shtete në të gjithë botën, përfshirë edhe vendet e BE-së. Sipas projektligjit, Shqipëria pritet të marrë 1 140 000 doza, shifër kjo që mbulon 20% të popullsisë. Kjo do të thotë se 570 mijë qytetarë të vendit tonë do të marrin dy doza të vaksinës në fjalë.
Shuma totale që do të paguhet është 3.99 mln Dollarë amerikanë, shifër kjo që do të paguhet nga buxheti i alokuar për Ministrinë e Shëndetësisë dhe FSDKSH.
“COVAX Facility” është një mekanizëm ndërkombëtar që koordinon resurset dhe kërkesën për vaksinë ndaj Covid-19 me kapacitetet prodhuese të kësaj vaksine.
Fillimisht do të furnizohen të gjitha vendet me mjaftueshëm doza për të mbuluar 20% të popullsisë. Më pas do të vijojë furnizimi i vendeve me pjesën e mbetur të dozave të kërkuara.
/a.r
