Ministri për Çështjet Vendore, Bledi Çuçi deklaroi të premten nga Fieri se “favorizimi i biznesit të riciklimit do t’i shërbejë pastrimit të Shqipërisë nga plehrat”.
Nëpërmjet miratimit të ligjit për “Importin e mbetjeve”, sipas ministrit Çuçi, është krijuar mundësia e mbijetesës dhe forcimit të një prej bizneseve më të gjelbër që njihet sot, biznesit të riciklimit. “Parë nga ky këndvështrim, mendoj se Shqipëria do jetë më e pastër me miratimin e këtij ligji. Në kushtet që janë sot, ky biznes riciklon rreth 120 mijë ton lëndë të kësaj natyre, që quhen mbetje. Imagjinoni po mos të ishte ky biznes se çfarë do të ndodhte, më e pakta do të kishim 120 mijë ton plehra më shumë për Shqipërinë, përfshirë plastikë, kanoçe, element shumë të dëmshëm për mjedisin në kuptimin më të gjerë të fjalës, pra në kuptimin e pasojave që i shkakton tokës depozitimi i këtyre mbetjeve”, u shpreh ai.
Në këtë drejtim, ministri Çuçi theksoi rolin e bashkive, të cilat sipas tij, “duhet të fillojnë një orë e më parë zbatimin e ndarjes së mbeturinave në burim, që nuk është gjë tjetër veçse fillimi i edukimit të njerëzve për të ndarë që kur hedhin mbeturinat në kosha të posaçëm me elementë të posaçëm”.
“Tirana filloi. Pra do jetë një lloj pilotimi për të parë efektet edhe përmasat e kësaj nisme dhe besoj se gjithë bashkitë e tjera do të fillojnë ta implementojnë këtë. Mos të harrojmë që është edhe një detyrim ligjor, jo vetëm kërkesë, për të krijuar ndarjen që në burim të mbeturinave nga bashkia”, tha Çuçi.
Favorizimi i biznesit të riciklimit, sipas tij , do të bëjën që vetë ky biznes të kontribuojë në rritjen e përqindjes së përpunimit të mbeturinave. “Të forcojmë biznesin e riciklimit, dhe mos të harrojmë që në vetëm në 3 vjet, ne kemi rritur këtë fuqi përpunuese, ricikluese, të biznesit vendas, për mbeturinat vendase, me 12-13 përqind, ndaj ishte i domosdoshëm miratimi i këtij ligji për ta mbajtur këtë biznes gjallë, sepse mendojmë se është një nga instrumentet kryesore për ta mbajtur Shqipërinë pastër, pa diskutim e kombinuar me gjithë masat e tjera, dhe me gjithë institucionet e tjera, duke nisur nga bashkitë e me radhë institucionet e tjera”, vijoi ai.
Ministri Çuçi ndodhej sot në Fier për të përmbyllur fazën e konsultimeve lidhur me përgatitjen e akteve nënligjore për zbatimin e ligjit për sinjalizuesit.
Ligji, sipas ministrit Çuçi, “hyn në fuqi në tetor të këtij viti dhe ai do të jetë një element i shtuar në luftën kundër korrupsionit, sidomos në aspektin e denoncimit të korrupsionit”.
“Ka një rëndësi të veçantë, sepse denoncimi do të vijë nga njerëz profesionistë, që e njohin funksionimin e organizatës, pra do jetë një lëndë e pare, nëse do e quanim kështu, profesionale dhe për prokurorinë. Mendojmë që përmes zbatimit të këtij ligji t’i japim një fytyrë të re institucioneve edhe sa i përket integritetit të tyre”, shtoi ai./
