Policia e Tiranës ka nisur hetimin për administratoren dhe përgjegjësen në Sektorin e Monitorimit, pas një denoncimi nga një emsion investigativ se në ambientet e spitalit administroheshin mbetje të rrezikshme jashtë kushteve të sigurisë.
Denoncimi në emisionin STOP u bë nga një sanitare e QSUT-së e cila shprehte shqetësimin e saj se prej një muaji, nuk punonte autoklava, e për pasojë, mbetjet spitalore grumbulloheshin tek pajisja në një dhomë jashtë saj, në të gjithë godinën, duke krijuar një vatër infeksioni, që rrezikon të përhapet.
“Ne shkojmë gjatë natës, për të verifikuar situatën dhe shohim, që autoklava nuk punon. Kjo situatë është për disa ditë me radhë, edhe pse ngjitur me autoklavën, ka disa institucione, stomatologjia, gjimnazi “Eqerem Cabej”, si dhe shtëpitë mbështetëse”, thotë ajo për STOP.
Pas kësaj situate blutë njoftojnë se gjatë kontrollit të ushtruar gjetën qese me mbetje të rrezikshme spitalore jashtë kushteve të sigurisë.
Sipas bluve dy punonjëset akuzohen për veprën penale ‘Menaxhimi i mbetjeve’.
Njoftimi i policisë:
Specialistët për Hetimin e Krimeve të Komisariatit të Policisë Nr. 4 referuan materialet në Prokurori ku nisi procedimi për veprën penale “Menaxhimi i mbetjeve”, për shtetaset O. J., 33 vjeçe dhe M. H., 33 vjeçe, me detyra respektive administratore dhe përgjegjëse në Sektorin e Monitorimit në një pavion në QSUT, sepse pas njoftimit nga gazetarët e emisionit investigativ “STOP”, se në ambientet e spitalit administroheshin mbetje të rrezikshme jashtë kushteve të sigurisë, shërbimet e Policisë kanë ushtruar kontroll dhe kanë gjetur disa qese me mbetje spitalore.
Materialet procedurale i kaluan Prokurorisë, për veprime të mëtejshme.
