Gjykata e Shkallës së Parë e Durrësit dje ka vendosur masën e sigurisë “Arrest me burg” ndaj 33-vjeçarit nga Shijaku, Ilir Gjoshi, i cili akuzohet se ka abuzuar seksualisht me mbesën e tij të mitur para tri vitesh.
Për asnjë moment, ai nuk e ka pranuar akuzën e ngritur nga policia. 33-vjeçari ka deklaruar se asnjëherë nuk e ka prekur mbesën e tij. “Nëse do të ishte e vërtetë ajo që thuhet se kam abuzuar me mbesën time në moshën 10-vjeçare, atëherë ajo do të kishte përfunduar në spital. Unë nuk i kam bërë gjë”, është shprehur i pandehuri.
Edhe avokatja e tij mbrojtëse e pajtuar prej të afërmve, ka thënë se klienti i saj nuk ka abuzuar me mbesën. “Nëse vajza është zhvirgjëruar, pse duan të akuzojnë klientin tim? Kjo mund të ketë ndodhur në vitet e mëvonshme dhe kush mund ta provojë se e ka kryer klienti im këtë vepër penale?” – ka pohuar mes të tjerash avokatja. Ndërkohë, prokurorja e çështjes, Enkelda Xhengo i kërkoi trupit gjykues që ndaj Ilir Gjoshit të vendoste masën e sigurisë “Burg pa afat”, si person me rrezikshmëri të lartë.
Nëse provohet akuza nga gjykata, 33-vjeçari rrezikon 25 vjet heqje lirie. Ekspertiza mjeko-ligjore në Tiranë, në rezultatet paraprake dërguar policisë së Shijakut, ka konkluduar se 13-vjeçarja është abuzuar seksualisht, sepse rezulton e penetruar. Sipas burimeve policore, vajza ka deklaruar se tri vite më parë është përdhunuar disa herë nga xhaxhai i saj në banesën e këtij të fundit. Hetuesit e çështjes sqaruan, se e mitura asokohe nuk ka kuptuar çfarë ka ndodhur realisht me të, ndërsa 3 vjet më pas, bëri kallëzim për abuzim seksual.
BW
