E diela e 25 gushtit shënoi fundin e pushimeve edhe për kabinetin qeveritar. Të mërkurën, ashtu sikurse janë edhe planifikimet e përhershme pritet një mbledhje e Kryeministrit Rama me anëtarët e Qeverisë, të cilët që prej 26 gushtit duhet të jenë në zyra për të nisur angazhimet e ministrive që ata drejtojnë.
Pritet që mbledhja të ketë shumë diskutime, bazuar më tepër në objektivat e çdo dikasteri për vitin politik. Kryeministri Edi Rama ka ndarë momente nga pushimet e tij në Shqipëri, ndërsa urdhri ka qenë që të gjithë anëtarët e kabinetit të pushojnë vetëm në vendin tonë.
Këtë e rikonfirmoi edhe vetë kreu i ekzekutivit në një postim përmes të cilit gjithashtu shuante zërat se kishte qenë vetë në Greqi për t’u çlodhur, siç pretendonin mediat greke.
Nëse ky urdhër ka gjetur apo jo zbatim, kjo mbetet e dyshimtë, sepse ka pasur edhe nga ata anëtarë të kabinetit qeveritar për të cilët në media të ndryshme janë publikuar foto me pushime jashtë vendit.
Për Ramën, pikënisja politike pritet të jenë bashkitë, që si rrallë herë drejtohen vetëm nga të majtët. Por, barrë për kryeministrin, që mban edhe postin e Partisë Socialiste do të jetë edhe Shkodra dhe zhvillimet që priten në këtë qark, pas dorëheqjes së Valdrin Pjetrit.
Kësisoj, kampi rozë do të përballet me punët e qeverisë, por edhe ato të partisë, kur dihet se opozita do të vijojë me aksionin politik, me qëllim rrëzimin e Ramës dhe zgjedhje, sipas saj, përmes një qeverie teknike dhe sigurisht me standarde./shqip
g.kosovari
