Spanja ka nisur të marrë frymë më lirshëm pas dëshpërimit dhe frikës që kaluan mijëra qytetarë spanjollë në tri javët e fundit si pasojë e zjarreve që u përhapën në një hapësirë mbi 300 mijë hektarë, u morën jetën katër personave dhe lënduan 48 të tjerë.
Vendi njoftoi të dielën se ka kaluar nga gjendja e emergjencës në gjendje gatishmërie dhe monitorimi të përhershëm.
“Për ta përmbledhur, ky episod tragjik në historinë e vendit tonë, që u shoqërua me zjarret më të mëdha për një periudhë 20-ditore, në një pjesë të rëndësishme të vendit tonë, ka mbaruar. Por sezoni i zjarreve vazhdon, prandaj askush të mos e ulë vigjilencën,” deklaroi shefja e Mbrojtjes dhe Emergjencave Civile, Virginia Barcones.
Gjatë muajit gusht, Spanja regjistroi 93 vatra zjarri nëpër pyje, në 59 prej të cilave u gjet para emergjencës operative. Ndërhyrjet e zjarrfikësve rezultuan të vështira për shkak të valës së gjerë të të nxehtit që përfshiu vendin, me erëra të forta në vende të paarritshme, ku detyroheshin të hynin personalisht për të luftuar me flakët.
Autoritetet kanë arrestuar 57 persona në lidhje me zjarret dhe 142 janë nën hetim si shkaktarë të mundshëm të tragjedisë mjedisore.
Që nga pasditja e kësaj të shtune, vetëm katër zjarre në pyje mbeten aktive dhe prognoza e autoriteteve duket e stabilizuar.
“Këtë betejë e kemi fituar së bashku. Por lufta nuk ka mbaruar, sepse ndryshimet klimatike janë ende këtu dhe tani të gjithë duhet të kthehemi për ta forcuar së bashku të gjithë sistemin, për të qenë në gjendje që të vazhdojmë ta mbrojmë vendin tonë.
Vala e të nxehtit nga 3 deri më 18 gusht ishte më intensivja dhe e treta për nga kohëzgjatja që nga viti 1975. Të paktën katër ditë ishin një rekord për sa u përket ditëve më të ngrohta. Dita me temperaturën mesatare më të lartë për datën specifike, që nga viti 1950, ishte 11, 12, 16 dhe 17 gushti,” tha Barcones.
