Floyd Mayweather nuk është më kampion bote. WBO i ka hequr titullin e fituar vetëm dy muaj më parë pasi mposhti Manny Pacquiao, në atë që u cilësua si “dueli i shekullit”.
Duke qenë se WBO nuk lejon që boksierët të mbajnë titujt në kategori të ndryshme të peshave, ai në datën 3 korrik duhet të dorëzonte titujt e tij të mëparshëm ose në të kundërt të paguante një tarifë prej 200 mijë dollarësh. Por, Floyd Mayweather nuk zgjodhi të bëjë as njërën dhe as tjetrën e për këtë arsye federata ka lëshuar njoftimin për vendimin e marrë, duke i hequr titullin. Duket e pabesueshme se si boksieri, i cili u zgjodh edhe si sportisti më i pasur në botë, nuk pagoi 200 mijë dollarë, kur ai vetëm nga ndeshja e 2 majit arriti të fitonte 220 milionë dollarë.
I vetmi arsyetim logjik, pse Maywether zgjodhi këtë rrugë, mund të jetë fakti që ai e shprehu përpara ndeshjes me Pacquiao, se kjo sfidë mund të jetë e fundit për të.
