Mërgim Mavraj është një nga surprizat e Këlnit në fazën e dytë të kampionatit.
Nga zgjedhje e katërt në qendrën e mbrojtës në dhjetor, futbollisti i Shqipërisë është aktivizuar titullar në tre takimet e fundit në Bundesligë, në barazimet 1-1 me Wolfsburgun dhe Hamburgun si dhe në fitoren 3-1 me Eintracht Frankfurt. Vetë 29-vjecari e pranon me mediat vendase se një muaj më parë as që e mendonte që do të kishte këtë vazhdimësi.
“Në ndeshjen me Stuttgartin, nuk u grumbullova dhe as që e mendoja se në takimin pasardhës në Bundesligë do të luajë titullar. Duhej të isha realist, por fati deshi që të luaja ndaj Wolfsburgut dhe në dy ndeshjet e tjera”.
Mavraj thjesht shfrytëzoi momentin, pasi iu dha mundësia për të luajtur për shkak të dëmtimit të Dominique Heintz.
“Unë jam profesionit dhe kam punuar shumë për të qenë gati. Trajneri e vlerësoi shumë lojën time ndaj Wolfsburgut. Vërtet jam i befasuar që gjithçka shkoi mirë, jam i lumtur që jam rikthyer në formacion pas shumë kohësh. Trajneri më ka dhënë shumë besim, kjo që po ndodh është e mrekullueshme”.
Viti 2015 ka qenë i vështirë për Mavrajn në aspektin personal, për shkak të humbjes së babait të tij, i cili vuante nga një sëmundje e rëndë.
“Babai im, që gjithmonë më ka qëndruar pranë në momentet më të vështira, fatkeqësisht ndërroi jetë. Kjo ngjarje më ka prekur shumë, ishte një goditje e rëndë për mua”.
Mavraj theksoi më tej se ka shumë besim te vetja, edhe nëse diçka nuk shkon mirë gjatë ndeshjeve, ai është i aftë ta përballojë presionin dhe të dalë nga situata. Aktivizimi i në vazhdimësi i Mavrajt është një lajm shumë pozitiv edhe për kombëtaren shqiptare në prag të Euro 2016, pasi 29-vjecari konsiderohet një nga pikat më të forta të formacionit të De Biasit në repartin e mbrojtjes.
