Mërgim Mavraj dhe Ingolstadt janë një hap kompletimit të kryeveprës së vogël sportive që ka nisur në dy muajt e fundit.
Sot Die Schanzer kanë fituar në transfertë 2-1 ndaj Wehen, në vajtjen play-off për një vend në Bundesligën 2.
Një paraqitje perfekte për Mavraj me shokë, sepse sulmuesi kryesor Dario Lezcano ishte në formë perfekte, me nga një gol në fillimin e secilës pjesë, ndërsa mbrojtja e Ingolstadt shkëlqeu, edhe pse në shtesë erdhi një gol shprese për Wehen. Mavraj (edhe një karton i verdhë sot) pati gisht edhe te goli i parë i ndeshjes, sepse pasimi i tij i gjatë gjeti Thomas Pledl, i cili menjëherë pasoi për Lezcano dhe ky i fundit nuk fali, në minutën e dytë të ndeshjes.
Gjithsesi, Ingolstadt ka fituar 6 nga 8 ndeshjet e fundit dhe është në formë spektakolare, ndaj në shtëpi, ndaj një rivali inferior, ka shumë pak gjasa që ta katranosë të martën e ardhshme.
Një triumf edhe për Mërgim Mavrajn, i cili në janar u kthye në Gjermani dhe muajt e fundit është kthyer në lider, duke qenë një ndër pikat kyçe të një ekipi që në periudhën shkurt-mars dukej i mbytur. Triumfi ka pasur shije edhe më të ëmbël për hakmarrjen e madhe të Mavrajt ndaj Hamburgut: pak javë më parë Ingolstadt fitoi në Hamburg dhe veriorët nuk u ngjitën dot në Bundesligë.
