Dita e hënë rikthen në bankat e shkollave mbi 31 mijë maturantë në të gjithë vendin. Për të folur rreth masave të marra si dhe procesin e provimeve, në studion e emisionit “Java në RTSH” ishte e ftuar Drejtoresha e Qendrës së Shërbimeve Arsimore, Rezana Vrapi.
Vrapi theksoi se së pari, edhe mbi vetë Maturën, është shëndeti i nxënësve dhe i stafit pedagogjik. Për këtë arsye, ministritë e Arsimit dhe ajo e Shëndetësisë janë koordinuar për të siguruar kushtet maksimale të higjienizimit në shkollat që do të hapin dyer më 18 maj.
Sa i përket mënyrës së zhvillimit të mësimit, Vrapi tha se klasat do të kenë 10-12 nxënës. Ne rastet kur një shkollë nuk ka kapacitet klasash për ta përballuar këtë shpërndarje, atëherë disa nxënës do të transferohen në shkollat 9-vjeçare që janë të lira.
Në studion e “Java në RTSH”, drejtoresha e QSHA tha se orët e mësimit do të jenë të plota, pra 45 minuta. Ajo shpjegoi edhe korrigjimin e testeve përmes skanerëve, që sipas saj kjo metodë është 100% e besueshme dhe e saktë.
“Pyetjet me alternativa janë formuluar në nivelin maksimal. Ky është viti i parë që testet bëhen në këtë formë. Por besueshmëria e korrigjimit është të tyre nuk lë vend për diskutim” – tha Rezana Vrapi.
Ajo pati edhe një apel për maturantët që do t’u nënshtrohen katër provimeve të maturës. Vrapi tha se në prag të testimeve ata duhet së pari të ruajnë vetën si dhe të mos e shoqërojnë procesin me ankth.
https://youtu.be/H3FRnZSpjRM
