Emigrantët trukoheshin për të kaluar kufirin, në mënyrë që të mos njiheshin. Është kjo mënyra në të cilën vepronte një bandë kriminale në Itali, e cila merrej me trafikimin e emigrantëve klandestinë drejt Zvicrës dhe Britanisë së Madhe, duke i kaluar tranzit nga Shqipëria.
Emigrantët trukoheshin në mënyrë që fytyra e tyre të ngjante me personat në kartat e identitetit false. Një agjenci e vërtetë udhëtimi ilegale, e shkatërruar nga policia e Genovas gjatë mbrëmjes së të mërkurës dhe mëngjesit të së enjtes, duke vënë në pranga tetë persona, mes tyre katër shqiptarë.
Hetimet nisën pas një grabitje në një sallë lojërash fati në 30 korrik 2018, në Genova ku u vodhën 12 mijë euro, që sipas hetuesve u realizua në bashkëpunim me kasieren.
Në atë kohë në pranga përfundian shqiptarët Eduart Theodhori, 39 vjeç dhe shqiptari tjetër Azen Shehaj, 41 vjeç, të cilët dyshohet se janë krerët e bandës së trafikut të klandestinëve.
Krahas tyre gjatë orëve të fundit u arrestuan edhe italiania Giuseppina Lanzo, 44 vjeçe, parukierja shqiptare, Arjana Metaliaj, 38 vjeçe, si dhe dy siçilianë Alessandro dhe Gaetano Girgenti, 51 dhe 36 vjeç.
Ndërkohë në arrest shtëpie përfunduan Pamela Perotto Ghia, 46 vjeç dhe shqiptari Can Lika, 56 vjeç.
Siç rezultoi në kuadër të hetimeve, çdo emigrant paguante nga 12 mijë euro, në mënyrë që të shpëtonte nga kontrolli dhe të shkonte në destinacionin përfundimtar. Nga Shqipëria ata mbërrinin në Genova ose në Palermo, ku trukoheshin në sallonin e bukurisë së parukieres shqiptare ‘B&B’.
Më tej pasi hipnin në makinë kalonin kufirin. Kështu policia në pesë muaj dokumentoi kalimin e së paku 30 refugjatëve, të cilët kishin paguar në total tek grupi i shqiptarëve 360 mijë euro.
/a.r
