Gjykata e Tiranës ka dënuar me 4 vjet burgim shtetasin Lavdimir Muço, i cili u shpall fajtor për “kallëzim të rremë” lidhur me një “skandal”, që ai pretendonte se kishte zbuluar në sistemin e drejtësisë.
Ky emër nuk është i panjohur për drejtësinë shqiptare, pasi në vitin 2014, ai u dënua me dy vjet burgim për “mashtrim”. Muço e ka shfrenuar fantazinë, duke pretenduar se ka video që provojnë se disa gjyqtarë dhe prokurorë kanë marrë para në këmbim të lirimit të të arrestuarve. Vendimi është dhënë me 18 tetor të këtij viti për akuzën e “kallë- zimit të rremë”.
“SKANDALI” NË DREJTËSI
I pandehuri Lavdimir Muço, i ka dërguar një letër Prokurorisë së Përgjithshme, në të cilën pretendonte se kishte dijeni për disa raste të korrupsionit të gjyqtarëve dhe prokurorëve dhe se dispononte regjistrime të pamjeve filmike që provonin pretendimet e tij. Ai është shoqëruar më pas te Krimet e Rënda, ku ka kallëzuar konkretisht disa punonjës të Prokurorisë dhe Gjykatës, si edhe një avokate për përfitime të parregullta me qëllim për të favorizuar disa persona nën arrest.
Ai ka folur për tri episode që ka regjistruar. Në episodin e parë, Muço ka thënë se ka dijeni për përfshirjen e një avokateje nga qyteti i Fierit në një skandal korrupsioni. Sipas tij, avokatja ishte takuar në Tiranë me një person, që kërkonte lirimin e vëllait kundrejt një pagese. Ai ka mashtruar në Prokurori duke thënë se e kishte ndjekur vetë rastin dhe kishte filmuar edhe momentin kur një gjyqtar kishte marrë paratë nga avokatja për lirimin e të akuzuarit.
Në episodin e dytë, Muço ka thënë se ka dijeni për një prokurore që ka marrë para nga një vajzë tjetër për të pushuar një çështje në ngarkim të vëllait të saj, që akuzohej, sipas Muços, për tentativë vrasjeje. Edhe episodi i tretë është i ngjashëm, ku ai pretendon se ka filmuar një prokuror që merr 10 mijë euro për të nxjerrë një trafikant nga burgu.
PROVAT INEKZISTENTE
Në dosjen e Prokurorisë, shkruhet se Lavdimir Muço pretendonte se filmimet i kishte në një apartament në Tiranë dhe hetuesit e kanë shoqëruar drejt apartamentit për të marrë videot. Ai ka pretenduar se çelësat e apartamentit i mbante djali i xhaxhait, por nuk pranoi të jepte emrin dhe numrin e telefonit të tij. Por nuk mbaron me kaq, nga verifikimet që Prokuroria bëri në ZVRPP, rezultoi se Muço nuk kishte asnjë apartament në pronësi të tij dhe se e gjitha ishte një sajesë. panorama
ma.me
