Lajmi i publikuar nga gazeta maqedonase Zhurnal.mk (online) një ditë më parë për ish-Presidentin e Iranit Mahmoud Ahmadinexhad është i sajuar. Ndonëse me një foto shoqëruese ku dukej Ahmadinexhad teksa mbante një shkop dhe shkruhej se ruan delet, përveç fotografisë e cila është reale shkrimi është një sajesë. Nga kërkimet e Shqiptarja.com është zbuluar një media iraniane dhe foto nga rrjetet sociale ku është publikuar fotografia e përdorur më pas nga Zhurnal dhe portale të tjera online.
Në të vërtet ish-presidenti iranian ka qenë në një vizitë në fshatin malor Kandelus në provincën Mazandaran të Iranit rreth një muaj sipas datës së shkrimit të publikuar nga media iraniane “Ebaarat” (web: ebaarat.ir). Për shkak të terrenit malor të fshatit Ahmadinexhad mbante një shkop, i shoqëruar nga banorë dhe shoqëruesit e tij, ish-presidenti kishte zgjedhur të lëvizte në këmbë dhe jo me automjete në mënyrë që të takohej me komunitetin të cilët nuk kanë nguruar të shkrepin dhe foto me Ahmadinexhad, disa prej tyre të hedhura në rrjetet sociale dhe disa të tjera të publikuara nga mediat iraniane. Publikimi i lajmeve të rreme, të sajuara qëllimisht ose jo është një ndër problematikat e ditëve të sotme për gazetarinë profesioniste. /ma.me
