Fitimet e larta dhe nivelet e qëndrueshme të kapitalizimit të bankave në Shqipëri kanë bërë që Fondi Monetar Ndërkombëtar të rekomandojë forcim të mëtejshëm të sistemit financiar. Sipas këtij institucioni, ky është një moment i përshtatshëm që bankat të ndërtojnë rezerva shtesë kapitali, si masë parandaluese për rreziqet e mundshme në të ardhmen.
Për ekspertët e tregut financiar, shtesa e kapitalit nuk lidhet me probleme aktuale në sistem, por me nevojën që bankat të jenë më të përgatitura për çdo zhvillim të papritur ekonomik apo financiar, nisur edhe nga ritmet dyshifrore që po njeh kreditimi.
Në afat të shkurtër, rritja e kërkesës për kapital mund të ndikojë në ritmin e kreditimit, por sipas ekspertëve, efekti afatmesëm është pozitiv për gjithë sistemin financiar.
“Nëse bankat mbajnë më shumë kapital në kohë të mira, ato janë shumë më të përgatitura në kohë të vështira. Ky kapital përdoret për të përballuar humbje të mundshme nga kreditë apo nga luhatjet e tregjeve financiare. Në afatmesëm, kjo forcon stabilitetin e bankave dhe rrit besimin në sistem”, shton eksperti.
Bazuar në analiza historike, teste stresi dhe vlerësim ekspertësh, FMN sugjeron se një rezervë sigurie në intervalin 1-2% të kapitalit, duke shfrytëzuar fitimet ekzistuese, do të garantonte një sistem bankar më të fortë dhe më rezistent ndaj goditjeve.
