Gjërat për Aleksis Tsipras pritet të bëhen të vështira, pas marrëveshjes së djeshme.
Duke iu referuar mediave greke, “Tema” shkruan se në Athinë tashmë ndaj tij ka pakënaqësi të madhe. Ato fillojnë që nga partia e Tsipras, Syriza.
Kjo, duke qenë se marrëveshja e djeshme konsiderohet ndryshim kursi. Tsipras akuzohet se vendosi ndryshe nga sa u votua në referendumin e 5 korrikut.
Për këtë arsye, disa dhjetra deputetë të partisë së tij, thuhet se nuk do ta votojnë marrëveshjen e arritur me Eurogrupin.
“Edhe aleatët e partisë Anel të Tsipras, pritet të votojnë kundër.Për këtë arsye, raportohet se Tsipras po mendon të japë dorëheqjen në fundjavë” – thotë Tema.
Fillimisht ai synon që të miratojë marrëveshjen të mërkurën në parlamentin grek, me anë të ndihmës së opozitës.
Më pas, ai mund të largohet, në mënyrë që këto masa shtrënguese të mos zbatohen nga ai.
Në rast të largimit të Tsipras, pritet që të krijohet një qeveri teknicienësh deri në zgjedhjet e reja të vjeshtës, kur Tsipras synon që të krijojë një koalicion edhe më të gjerë, për t’u rikthyer sërish në pushtet.
