Pas grabitjeve të një pas njëshme të sasive të valutës nga furgonat e bankave, si dhe pas gjendjes jo të sigurtë që paraqesin kompanitë e sigurisë së transportit të parave kash, duket se qeveria ka në plan marrjen e masave.
Janë pikërisht këto masa që po hartohen nga Ministria e Brendshme në bashkëpunim me Bankën e Shqipërisë, të cilat synojnë jo vetëm mospërsëritjen e rasteve të grabitjeve spektakolare, por duan të rrisin edhe sigurinë gjatë transportit të vlerave monetare.
Nisur nga ky fakt, shoqërive private që merren me sigurimin dhe transportin e vlerave monetare të bankave të nivelit të dytë, do t’u kërkohet fillimisht rinovimi i flotës së mjeteve të transportit të parave kash, pra furgonave të blinduar, si dhe specializimi i stafit që do të meret me këtë proces.
Burime nga Policia e Shtetit bënë të ditur se, po studiohen disa modele automjetesh për transportin bankar, edhe për faktin se furgonët e bankave do të jenë që këtej e tutje të një modeli, të një ngjyre dhe të një niveli sigurie dhe se vetëm stemat e kompanive do të ndryshojnë sipas bankave, raporton “Mapo”.
Deri tani sipas burimeve të policisë janë ofruar disa kompani që mund të mbulojnë me mjete këtë shërbim, ndërkohë që marka me e përfolur e furgonëve që mund të përdoren nga shoqëritë e sigurisë do të jenë Furgonët “Mercedes-Benz Sprinter” të një modeli të ri dhe të posaçëm për transportin e vlerave monetare.
