Policia e Dibrës ka vënë në pranga njërin prej autorëve të dhunimit të kreut të Njësisë Administrative Tomin, në Dibër, dy ditë më parë. Siç raporton policia e qytetit verior, Dritan Selishta ishte person me precedent të mëparshëm penal dhe kapja e tij është bërë në fshatin Brezhan.
Policia shton se Selishta ka dhunuar në bashkëpunim dhe me një tjetër person kreun e Njësisë Administrative Tomin, Nuri Meda. Lidhur me ngjarjen, Partia Socialiste e ka konsideruar këtë si një akt të turpshëm, ndërkohë që Partia Demokratike e ka lidhur çështjen me blerjen e votave për zgjedhjet e nesërme që do të mbahen në Dibër.
Por, Nuri Meda i ka mohuar kategorikisht këto akuza, duke thënë se ai kishte shkuar në vendin e ngjarjes pasi kishte pasur informacion se Selishta po shpërndante para për blerjen e votave. Gjatë një interviste për Report Tv, Meda deklaroi se ishte dhunuar barbarisht dhe se në momentin e ngjarje s’ka qenë e pranishme në vendngjarje edhe policia.
Ai u dërgua në spital, pasi kishte plagë të forta në trup e kokë, për shkak të goditjeve, sipas tij, me dorezë hekuri nga Selishta. Plagët që kishte marrë Meda ishin qepur nga vetë kandidati i majtë për bashkinë e Dibrës, Muharrem Rama, i cili ka lënë në mes takimet elektorale dhe ka shkuar për ti ardhur në ndihmë mjekësore Medës.
Ja komunikata e policisë
Shërbimet e Policisë Dibër, mbi bazën e informacioneve të marra në rrugë operative për vendodhjen e shtetasit të shpallur në kërkim policor Dritan Selishta, kanë organizuar menjëherë punën për kapjen e tij.
Rreth orës 13:00, datë 10.09.2016, në fshatin Brezhdan, njësia Administrative Tomin, në afërsi të banesës së tij, shërbimet e policisë kanë bërë kapjen e shtetasit të shpallur në kërkim policor :
· Dritan Selishta 34 vjeç, banues në fshatin Brezhdan, Dibër, person me preçedent të mëparshëm kriminal.
Ky shtetas ishte i shpallur në kërkim policor si autor i dyshuar i ngjarjes së ndodhur me datë 08.09.2016, në fshatin Pilaf, njësia Administrative Tomin.
Ky shtetas dyshohet se ka goditur me grushte dhe sende të forta Administratorin e njësisë Administrative Tomin, shtetasin N.M, 58 vjeç.
Shërbimet e policisë kanë bërë shoqërimin në ambientet e policisë Dibër të shtetasit Dritan Selishta, ku në bashkëpunim me Prokurorinë do të kryejn veprimet e mëtejshme në lidhje me këtë ngjarje.
Në përfundim të veprimeve proceduriale që do të kryhen në bashkëpunim me Prokurorinë do tju nisim informacion përfundimtar.
