Eksperti i Sigurisë, Fation Softa shprehet se masakra e Velipojës ishte një luftë e vërtetë.
Në një intervistë për Ora, ai u shpreh se ngjarja mund të evitohej, por fakti që në një konflikt ka armë situata është e frikshme.
Më tej ai shton se në vendin tonë, ka një numër të madh armësh dhe sipas tij shumë prej tyre vijnë nga Kosova, Mali i Zi dhe Maqedonia.
“Ngjarja e mbrëmshme ishte një ngjarje e dhimbshme, ishte një luftë e vërtetë, në një zonë bregdetare, në një kohë të papërshtashme. Kanë filluar të vijnë pushuesit e parë. Ngjarje të tilla ndodhin dhe kanë për të ndodhur vazhdimisht sepse në 30-vjet, në bregun e detit apo në rërë ka pasur probleme, sepse këto janë probleme të akumuluara, të pazgjidhura duke filluar që nga njerëz të përfshirë, ish-politikanë, njerëz të krimit apo dhe njerëz për shkak të mbivendosjes apo për shkak të këtyre pronave kanë ndodhur këto konflikte.
Mund të evitohej, por fakti se sa herë ka një konflikt armët gjendet shpejt, kjo është e frikshme. Parandalimi mund të vinte, por ngjarjet janë brenda. Armët janë në popullatë, janë në masivitet, kushdo që ka pasur nevojë për armë e ka pasur të lehtë ta gjej.
Armët vijnë vazhdimisht, hyjnë nga kufiri i Kosovës, Mali i Zi, kufiri me Maqedoninë, kurse armët e BE vijnë nga rrugë të tjera dhe janë armë të vogla. Fakti që herë pas herë dëgjojmë se u sekuestruan kallashnikov, kjo do të thotë se këto armë janë në territorin shqiptar. Kallashnikovët janë të ’97.”, u shpreh Softa.
/b.h
