Një ngjarja e rëndë ka ndodhur në Shtetet e Bashkuara të Amerikës, ku 14 persona raportohet se kanë humbur jetën nga të shtenat me armë ndërsa 17 të tjerë janë plagosur në qytetin e San Bernardinos në Kaliforni.
Ngjarja ka ndodhur në një qendër të shërbimit për personat me aftësi të kufizuar.
Sulmi me armë është kryer nga tre persona të veshur me uniformë ushtrie dhe që dyshohet se ishin edhe të veshur me antiplumb.
Shefi i policisë së San Bernardinos, Jarrod Burguan, bëri të ditur se dy nga sulmuesit janë vrarë në përpjekje me policinë.
Burguan tha se ishte një mashkull e një femër, ndërkohë që konfirmoi se është edhe një person i tretë i arratisur nga vendngjarja, për të cilin po kërkohet në çdo shtëpi të zonës.
Një person është ndaluar duke u larguar nga vendngjarja, por nuk dihet ende nëse ka lidhje me ngjarjen, pasi nuk është identifikuar ende.
Gjithashtu, është mësuar se një tjetër person ka bërë sherr brenda qendrës në mëngjes dhe është larguar i zemëruar, por nuk dihet nëse ka lidhje me sulmet që ndodhën më pas.
Dy të vrarët nga policia kishin bomba artizanale, të cilat i hodhën nga makina GMC Yucon gjatë ndjekjes.
Një polic është plagosur, por është jashtë rrezikut për jetën.
Policia dhe FBI nuk kanë të dhëna për motivin e sulmit, por nuk e përjashtojnë as terrorizmin.
