Të afërmit e tre prej 49 viktimave të sulmit që ndodhi verës në një klub nate në Florida e kanë paditur Twitterin, Google dhe Facebook-un me akuzën se këto rrjete sociale kanë ofruar “përkrahje materiale” për autorin e sulmit.
Omar Mateen ka vrarë 49 persona në klubin e natës, Pulse në Orlando në muajin qershor, sulm ky i cilësuar më i rëndi me armë zjarri në historinë moderne amerikane.
Mateen, që është vrarë nga policia pas sulmit, ishte vetdeklaruar si përkrahës i grupit militant, Shteti Islamik.
Familjet e tre viktimave të këtij sulmi, pretendojnë se Twitter, YouTube që është pronë e Google dhe Facebook kanë “mundësuar që grupi terrorist të ketë profile dhe përmes tyre të shpërndajnë propagandë ekstremiste, të mbledhin fonde dhe të sigurojnë rekrutë të rinjë”, raporton rel.
Padia thotë se “përkrahja materiale ka qenë instrumentale” për rritjen e IS-it duke “mundësuar për ta që të kryejnë sulme apo të shkaktojnë kryerjen e shumë sulmeve terroriste”.
Padia është bërë më 20 dhjetor në një gjykatë federale të Detroitit, ndërsa të njejtën ditë, Facebook përmes një komunikate ka thënë se ata janë të “përkushtuar që të ofrojnë shërbime aty ku njerëzit ndjehen të sigurt për të përdorur Facebook-un”.
Facebook, Google, Twitter, dhe Microsoft kanë thënë gjatë këtij muaji se ata do e përmirësojnë bashkëpunimin në mes tyre për heqjen e përmbajtjes ekstremiste.
