Ajo që po ndodh me shtratet e lumenjve, është një tjetër masakër mjedisore, që konsumohet çdo ditë nën hundën e institucioneve shtetërore. Një vëzhgim i emisionit “STOP” tregon gërryerjen në lumin Mat, përgjatë rrugës Tiranë-Lezhë. Bujar Shpendi, specialist në Drejtorinë e Baseneve në Lezhë, thotë se firmat që ushtrojnë aktivitetin në shtratet e lumenjve janë me leje për rehabilitimin e tyre, që bazohet në urdhrin e Ministrisë së Bujqësisë të muajit Shkurt 2017.
Drejtori i Politikave të Baseneve Ujore, Arben Pambuku, shpjegon se urdhri i ministrit është keqinterpretuar dhe firmat abuzojnë, duke marrë inerte që duhet të përdoreshin për rehabilitimin e lumenjve.
Edhe pse në nenin 67 të ligjit numër 11 të vitit 2012, për menaxhimin e integruar të burimeve ujore, thuhet se është e ndaluar marrja e materialeve inerte, rërë, zhavorr, gurë ose plisa, përgjatë aksit Tiranë – Lezhë vihet re masakra mjedisore që po i bëhet lumit Mat. Por organet kompetente për menaxhimin e burimeve ujore mesa duket kanë “mbyllur sytë”, duke lejuar në këtë mënyrë shkatërrimin e lumit Mat.
Gazetarja e emisionit “STOP” komunikoi me Bujar Shpendin, specialist në Drejtorinë e Baseneve në Lezhë, i cili u shpreh se grumbullimi i inerteve shkon në favor të lumenjve, pasi shfrytëzohen për të mbajtur të rregullt rrjedhën e lumit.
“Për sa i përket punimit të subjekteve në lumin Mat, janë me leje për rehabilitimin e lumit. Në bazë të urdhrit numër 309, datë 31.05.2016, për ngritjen e grupit institucional të punës për identifikimin e nevojave për rehabilitimin e shtretërve te lumenjve, grupi i punës, ku pjesë e saj kemi qenë edhe ne, kemi bërë verifikim në terren të të gjithë lumit me segmentet përkatëse. Janë evidentuar 4 segmente për ndërhyrje të nevojshme për rehabilitim, pasi është e nevojshme që lumi të rehabilitohet për mosdevijim dhe gërryerje të tokave bujqësore.”
I pyetur nga gazetarja sesi shfrytëzohen inertet që nxirren nga lumi Mat, Bujar Shpendi u shpreh se ato përdoren për mbushjen e gropave dhe devijimit të lumit në dy krahët e shtratit të tij dhe si rrjedhojë nuk janë shfrytëzuar nga subjektet private.
Drejtoria e Baseneve Ujore në Lezhë deklaroi se në bazë të urdhrit të Ministrit të Bujqësisë, për rehabilitimin e lumenjve, kanë përfituar leje shfrytëzimi deri në vitin 2022 disa subjekte private. Por në bazë të investigimit të emisionit “STOP” rezultoi se këto subjekte private i përdorin inertet për përfitime vetjake dhe jo për të ruajtur rrjedhën e lumenjve.
Ndërsa Drejtori i Politikave të Baseneve Ujore, Arben Pambuku thotë se urdhri i ministrit është keqinterpretuar dhe se firmat abuzojnë, duke marrë inerte që duhet të përdoreshin për rehabilitimin e lumenjve.
“Urdhri ka qenë në ndihmë të mbrojtjes së shtretërve të brigjeve të lumenjve. Në asnjë rast nuk ka patur një urdhër për të shfrytëzuar shtretërit apo brigjet e lumenjve. Në bazë të këtij urdhri, grupi i punës ka përgatitur materialin, i cili iu është dërguar të gjashtë drejtuesve të Këshillave të baseneve të Republikës së Shqipërisë.”
Vetëm kryetari i Këshillit të Baseneve dhe institucioni i Këshillit të Basenit janë organet vendimmarrëese për dhënien e lejeve për çfarëdo lloj aktiviteti në një trup ujor. Shfrytëzimi i inerteve është kategorikisht i ndaluar. Janë në kundërshtim me ligjin nëse nuk kanë zbatuar kushtet e lejes, për të cilën kanë aplikuar.”
Arben Pambuku shprehet se po kryhet abuzim, ndaj kërkon revokimin ose shfuqizimin e lejes së këtyre subjekteve private, gjithashtu masë administrative për inspektoratet që kanë lidhje me aktivititetin, i cili është në kundërshtim me lejen e dhënë./tvklan.al/ma.me
