Të paktën 32 persona u vranë dhe dhjetëra të tjerë u plagosën në një sulm izraelit në një shkollë të OKB-së që strehon persona të zhvendosur në al-Nuseirat, në Rripin qendror të Gazës.
Zyra e shtypit e qeverisë së Gazës, e drejtuar nga Hamasi akuzoi Izraelin për kryerjen e një “masakre të tmerrshme”… që turpëron njerëzimin”.
Ismail Al-Thawabta, drejtor i zyrës së shtypit, hodhi poshtë pretendimet e Izraelit se kishte një post komandimi të Hamasit në shkollën e agjencisë së refugjatëve të OKB-së në Nuseirat.
Ushtria izraelite konfirmoi se avionët e saj luftarakë shënjestruan një shkollë të OKB-së në al-Nuseirat, duke thënë se ajo kishte qenë shtëpia e terroristëve të Hamasit që kishin marrë pjesë në sulmin e 7 tetorit në Izrael.
“Terroristët që kishin planifikuar të kryenin sulme në të ardhmen e afërt ishin eliminuar dhe se shumë hapa u ndërmorën për të zvogëluar mundësinë e dëmtimit të atyre që nuk ishin të përfshirë”, tha ushtria.
Pamjet në X të postuara nga gazetarët palestinezë në orët e para të së enjtes treguan rreshta trupash të shtrirë në spitalin al-Aqsa në Deir al-Balah dhe fëmijë të plagosur që po trajtoheshin në dysheme.
/a.r
