Federata Angleze ka pohuar se ka ngritur akuzë kundër mbrojtësit të Manchester City, Martin Demichelis, për “qëndrim jo korrekt në lidhje me bastet”. Lojtari argjentinas ka kohë deri më 5 prill për t’iu përgjigjur akuzave nga FA.
“Besohet se lojtari ka kryer 12 shkelje të Rregullit E8 të FA, midis 22 dhe 28 janar 2016”, thuhet në njoftimin zyrtar të FA.
Më parë, lojtarëve të Premier League u lejohej të vinin baste për ndeshje të kompeticioneve ku nuk merrnin pjesë, por së fundi rregullat janë ndryshuar dhe nuk lejojnë vënien e basteve për asnjë ndeshje, kudo qoftë në botë.
Nëse rezulton fajtor, Demichelis rrezikon të dënohet me gjobë, të paktën kështu janë precedentët në Premier League.
James Demetriou i Swansea City u gjobit me 700 sterlina pasi kishte vënë 13 baste midis dhjetorit 2013 dhe janarit 2015, ndërsa Andros Townsend i Tottenhamit u gjobit 18 mijë sterlina dhe mori një pezullim 4-mujor me kusht.
