Një përfaqësi e naftëtarëve të Ballshit dhe Sindikatës u takuan sot në Ministrinë e Infrastrukturës dhe Energjitikës me ministrat Damian Gjiknuri, Arben Ahmetaj dhe përfaqësues të firmës që menaxhon uzinën e përpunimit të naftës.
Sipas sindikalistëve, administratori i uzinës u ka premtuar se do të marrë kredi për të paguar nesër dy rroga të prapambetura.
Për të kërkuar pagat dhe derdhjen e kontributeve në sigurimet shoqërore, rreth 200 punonjës të uzinës së përpunimit të thellë të naftës u nisën një ditë më parë në këmbë nga Fieri deri në Lushnje, për të vijuar më pas një pjesë rruge me autobus për në Tiranë.
***
Protesta e naftëtarëve të Ballshit dhe Fierit ka vazhduar ditën e sotme.
Pasi kanë marshuar një ditë më parë nga Fieri drejt Tiranës, këtë mëngjes ata janë mbledhur para Ministrisë së Infrastrukturës dhe Energjisë.
Ata kërkojnë që qeveria të ndërhyjë në mënyrë që të marrin pagat e prapambetura dhe t’u paguhen sigurimet shoqërore.
Teksa dhjetëra protestues janë mbledhur para ministrisë, një përfaqësi e tyre, 6 naftëtarë kanë zhvilluar një takim me ministrin Damian Gjiknuri.
Ata thonë se “kërkojnë veprimin e qeverisë për pagat”, ndërsa shtojnë se janë të vendosur në kërkesat e tyre, dhe për këtë “qeveria duhet të zbatojë ligjet”.
Naftëtarët e Ballshit dhe Fierit nuk kanë marrë pagesat e 12 muajve, dhe prej disa ditësh kanë filluar protestat.
Ditën e djeshme, 200 naftëtarë marshuan më këmbë nga Fieri në drejtim të Tiranës, në shenjë protestë për problematikat me të cilat përballen.
a.ç
