Kthesë në hetime lidhur me vrasjen e 71-vjeçarit shqiptar, Shefki Kurti në Itali.
Trupi i tij u gjet i copëtuar më 28 korrik. Hetuesit nuk përjashtojnë asnjë pistë, madje as faktin që Kurti mund të ketë kërkuar para nga fajdexhinjtë.
Policia thotë se nga mënyra si ka ndodhur, duket një vrasje e ndodhur nga një vrasës pa përvojë. Ata shtojnë se në panik e sipër, autori është përpjekur të heqë qafe trupin e viktimës duke e hedhur në kanalin e Adigettos.
“Asnjë vrasës me përvojë nuk do të kishte zgjedhur ta bënte këtë,” thotë shefi i policisë.
Hetuesit po gërmojnë dhe po kërkojnë gjurmë në të kaluarën e viktimës dhe familjes së tij. Ekziston pista që dikush nga familja është mbështetur te ndonjë fajdexhi për të marrë para hua.
Ditën e djeshme pas një kontrolli fillestar nga departamenti i mjekësisë ligjore të komandës krahinore të Arma di Rovigo, mbërritën nga Parma ekspertët e RIS, të cilët kontrolluan centimetër pas centimetri të gjithë banesën që viktima ndante me gruan e tij në via Girardini 78.
Për të kuptuar se çfarë kërkojnë hetuesit, është mirë të bëjmë një hap prapa dhe të përmbledhim shkurtimisht fazat e krimit të tmerrshëm që tronditi të dyja anët e Adigeve: Nga njëra anë Badia, ku jetonte viktima, dhe nga ana tjetër Masi, ku jeton djali që tani ka strehuar edhe nënën e tij, e cila ka mbetur e pastrehë nga sekuestrimi i banesës.
g.kosovari
