Rumania është shteti i radhës me të cilin Shqipëria pritet të ratifikojë në Kuvend marrëveshjen “Për mbrojtjen shoqërore”.
Komisioni i Çështjeve Sociale dhe Komisioni i Jashtëm miratuan të martën ratifikimin e këtij dokumenti, nga i cili do të përfitojnë 1500 qytetarë shqiptarë që jetojnë në Rumani.
I pranishëm në komisionin e Çështjeve Sociale, drejtori i Përgjithshëm i Institutit të Sigurime Shoqërore, Astrit Hado, tha se parimi i parë i këtij dokumenti është trajtimi i barabartë i shtetasve të të dy vendeve dhe në funksion të lëvizjes së lirë të krahut të punës. Po ashtu, një tjetër parim sipas tij, është totalizimi i periudhave kontributive për efekt të plotësimit të kushteve për të përfituar një pension sipas legjislacionit të të dy vendeve.
Pas diskutimeve, nënkryetarja e komisionit, Klodiana Spahiu, falenderoi ISSH-në për nxitjen që i ka dhënë së fundi kalimit të marrëveshjes ‘Për mbrojtjen shoqërore” në ato vende ku ka shtetas shqiptarë. Në këtë kuadrë, tha ajo, mbetemi në pritje të finalizimit të marrëveshjeve kryesore me dy shtetet ku dhe numri i shtetasve shqiptarë është më i madh, me Italinë e Greqinë.
“Edhe kjo marrëveshje me Rumaninë, pavarësisht se janë vetëm 1500 shtetas shqiptarë, është e rëndësishme sepse tregon angazhimin e qeverisë për mbrojtjen shoqërore të të gjithë qytetarëve të saj kudo ku ata janë”, tha Spahiu.
