Në fjalën e tij në Komisionin për Europën dhe Punët e Jashtme, Kryetari i Grupit Parlamentar të Partisë Socialiste dhe Drejtuesi Politik i PS për Diasporën, Taulant Balla vlerësoi marrëveshjen mes Shqipërisë dhe Italisë si një hap të rëndësishëm strategjik, me fokus të veçantë mbështetjen për diasporën shqiptare në Itali dhe forcimin e lidhjeve kulturore mes dy vendeve.
Balla theksoi rolin vendimtar të komunitetit shqiptar në Itali në proceset demokratike të vendit, duke nënvizuar se diaspora shqiptare në Itali ishte komuniteti me pjesëmarrjen më të lartë në zgjedhjet e 11 majit, çka sipas tij i dha qeverisë mandatin për të vijuar reformat integruese.
“Dhe gjej rastin të falënderoj diasporën shqiptare që jeton në Itali edhe për një fakt tjetër, që ishin edhe numri më i madh i shqiptarëve që morën pjesë në zgjedhjet e 11 majit. Duke votuar për herë të parë. Dhe duke i dhënë mbështetjen qeverisë sonë për të vijuar reformat integruese në rrugën drejt anëtarësimit në Bashkimin Evropian”, u shpreh Balla.
Një vend të veçantë në fjalën e tij zuri edhe komuniteti italian në Shqipëri, si dhe komuniteti arbëresh, të cilin Balla e cilësoi si një frymëzim për shqiptarët.
“Komuniteti arbëresh është një inspirim i madh për çdo shqiptar pas 500 vitesh, një model i shkëlqyer i ruajtjes dhe promovimit të kulturës dhe gjuhës shqipe“, tha ai, duke përshëndetur njëkohësisht vendimin e qeverisë Meloni për të mundësuar transmetime në gjuhën shqipe arbëreshe në kanalet e RAI-t.
Balla theksoi se një element thelbësor i kësaj marrëveshjeje historike është sanksionimi i transmetimeve të ndërsjella të kanaleve publike, çka do të rrisë mirëkuptimin kulturor mes dy vendeve dhe do të ndihmojë në ruajtjen e identitetit gjuhësor të diasporës.
“Është sanksionuar përfshirja e transmetimit të kanaleve publike në territorin e palës tjetër, një hap shumë i rëndësishëm për ndërveprimin kulturor dhe qytetar mes komuniteteve”, u shpreh ai.
Në vijim, Kryetari i Grupit Parlamentar të PS u ndal edhe tek marrëveshja për njohjen e ndërsjellë të kontributeve të sigurimeve shoqërore, e cila tashmë ka hyrë në fuqi.
“Sot, rreth 500 mijë motra dhe vëllezër shqiptarë që jetojnë në Itali janë përfitues të kësaj marrëveshjeje, e cila u miratua në mënyrë të përshpejtuar nga të dyja dhomat e Parlamentit italian”, deklaroi Balla.
Në përfundim, ai theksoi rolin e Kuvendit në monitorimin e zbatimit të marrëveshjes dhe nxitjen e qeverisë për të zgjeruar modele të ngjashme bashkëpunimi edhe me vende të tjera partnere, ku jetojnë komunitete të mëdha shqiptare.
“Besoj që shpreh vlerësimin e të gjithëve, është një marrëveshje e cila gëzon mbështetjen dhe padyshim që roli i Kuvendit është të monitorojë. Dhe të monitorojë zbatimin e kësaj marrëveshjeje dhe të nxisë qeverinë, që marrëveshje të tilla, të negociohen dhe të firmosen edhe me vende të tjera partnere. E nënvizova Greqinë, por edhe me vendet e tjera ku jetojnë dhe punojnë shqiptarët”, përfundoi Balla fjalën e tij në Komision.
