Në Bruksel u mbajt takimi Kosovë-Serbi për zbatimin e Marrëveshjes për njohjen reciproke të diplomave. Në takim morën pjesë delegacionet e të dyja shteteve, Republikës së Kosovës dhe të Serbisë me ndërmjetësimin e Bashkimit Evropian.
Në këtë takim, Bashkimi Evropian bëri të njohur se ka përcaktuar mekanizmin ndërkombëtar si certifikues të diplomave të nivelit universitar ( për bachelor, master dhe doktoraturë) të lëshuar nga të dy shtetet. Ky mekanizëm sipas njoftimit, përbëhet nga ekspertë të fushës akademike të BE-së dhe diplomat e cerftifikuara do të mbajnë logon e BE-së.
Pas certifikimit nga BE-ja, pastaj të dyja shtetet kanë detyrim të njohin dhe certifikojnë diplomat universitare të njëra- tjetrës, ashtu siç e përcakton marrëveshja për diploma e arritur në Bruksel më 19 Janar 2016.
Ministrja për Dialog, Edita Tahiri vlerësoi lart këtë hap të ndërmarrë nga Bashkimi Evropian si dhe inkurajoi kandidatët e interesuar për njohjen e diplomave të aplikojnë pranë zyrave të organizatës SPARK në të dyja shtetet për të paraqitur aplikacionin për njohje e diplomave, e cila pastaj do ta realizoj procesin e certifikimit ndërkombëtar. Tahiri sidomos vlerësoi se kjo marrëveshje është shumë e dobishme për shqiptarët e Luginës së Preshevës, të cilët kryesisht kanë kryer studimet në Kosovë që të aplikojnë për certifikimin e diplomave të mundësuar nga dialogu i Brukselit.
Ajo shprehu bindjen se tani të diplomuarit, shqiptarët e Luginës së Preshevës, duhet të shfrytëzojnë këtë mundësi që të kthehen të jetojnë dhe punojnë në trevat e tyre, duke mos lejuar skemat e Serbisë për zbrazjen e Luginës së Preshevës nga shqiptarët, e cila po ndodh prej shumë vitesh.
Në takim, BE ka njoftuar po ashtu se është në finalizim të kontraktimit edhe të një organizate tjetër ndërkombëtare e cila do të bëjë certifikimin e diplomave të nivelit parauniversitar që përfshijnë certifikimin e diplomave të shkollimit fillor, të mesëm, vokacional, nivelin e pestë të kualifikimeve sipas kornizës së kualifikimeve evropiane (EQF), etj.
Takimi i radhës i grupit të punës për vlerësimin e zbatimit të marrëveshjes për njohjen reciproke të diplomave pritet të mbahet pas dy javësh, ku palët do të takohen me partnerin zbatues të marrëveshjes SPARK dhe përfaqësuesit e BE-së./KosovaPress/a.m.
