Situata në Mariupol, që është nën rrethim ditët e fundit, po bëhet gjithnjë e më kërcënuese për popullsinë civile, ndërsa rusët bombardojnë vazhdimisht qytetin-port strategjik të Ukrainës.
Objektet e konsiderueshme të furnizimit janë shkatërruar dhe të gjitha përpjekjet për të evakuuar popullsinë civile përmes korridoreve të sigurta deri më tani kanë dështuar. Deklaratat e nënkryetarit të bashkisë së Mariupolit, Sergei Orloff, në revistën e rrjetit gjerman ARD, pasqyrojnë tmerrin e luftës.
“Qyteti është nën bombardim të vazhdueshëm dhe rrugët përreth qytetit janë dëmtuar rëndë. Kamionët e ndihmave humanitare, për shembull, nuk mund të arrijnë në qytet, ashtu siç nuk mund të dorëzohen furnizimet mjekësore”, tha ai.
Sipas vlerësimeve të nënkryetarit të bashkisë së Mariupolit, rreth 200 mijë qytetarë po tentojnë të largohen nga qyteti në orët e fundit.
“Nuk di si ta përshkruaj shkatërrimin që ka pësuar qyteti ynë. Mariupol në fakt nuk ekziston më. Skena të kujton Groznin dhe Aleppon,” tha Orloff.
“Ushtria ukrainase është shumë e guximshme, por rusët që hedhin bomba, ajo nuk ka armë për të mbrojtur jetën e civilëve”, shtoi ai.
Komandanti i përgjithshëm i forcave të armatosura të Ukrainës thotë se Rusia ka lëshuar 328 raketa në qytetet ukrainase që nga fillimi i pushtimit më 24 shkurt.
“Ky krim i përgjakshëm i regjimit të Putinit është një shkelje e hapur e ligjit ndërkombëtar humanitar,” tha gjenerali Valeriy Zaluzhny.
Rusia ka mohuar të ketë shënjestruar civilët gjatë asaj që e quan “operacioni special” në Ukrainë. Megjithatë, luftimet vazhduan në qytetet e reja të premten pasi Rusia filloi të zgjeronte pushtimin.
Lutsk, Ivano-Frankivsk dhe Dnipro janë goditur në orët e fundit, së bashku me Kharkiv dhe Mariupol, të cilat kanë qenë vendi i bombardimeve të pamëshirshme.
g.kosovari
