Ekuipazhi i anijes “Çelepia 2” vijon të mbahet peng nga marinari egjiptian Adel Salam, i cili vazhdon me kërcënimet. Ai ka theksuar se sot është dita e fundit për të dorëzuar 70 mijë eurot, në të kundërt do të djegë barkën.
I biri i marinarit Flori Çelepia, në një intervistë për News24 deklaroi se kontaktet janë të shumta me pengmarrësin, por asnjë kontakt nuk ka me kapitenin e anijes, Dhimitër Malja, jeta e të cilit është vënë në dyshim, pasi pengmarrësi, jep disa versione të kundërta për jetën e kapitenit.
“Autoriteteve policore iu kemi vënë gjithçka në dispozicion por përveçse na marrin në pyetje nuk na japin asnjë të dhënë tjetër. Iu kemi vënë në dispozicion numrin e pengmarrësit, numrat e llogarive ku kërkon t’i hedhim nga 10 mijë euro, mesazhet zanore kërcënuese të regjistruara, por tani nuk është bërë asgjë. Pengmarrësi na bën shantazh vazhdimisht dhe është i lirë”, thotë Flori Çelepia.
Djali i vetëm i familjes Malja, Damiani me lot në sy i bën apel strukturave të shtetit të ndërhyjnë për të ditur çfarë po bëhet me jetën e babait të tij.
“U nis në punë, e nuk kemi asnjë informacion ku është babai? Ku ta gjej? Shteti nuk më thotë ku të shkoj e të kërkoj babanë”, apelon djali i kapitenit të anijes, shkruan shqip.
Pronari i anijes thekson se nëse autoritetet do të kishin ndërhyrë, pengmarrësi egjiptian do të ishte para drejtësisë.
