Një shqiptar i moshës 22-vjeçare u arrestua nga policia italiane në orët e vona të mbrëmjes së të mërkurës së 4 marsit.
I riu po lëvizte me makinë me të dashurën, një vajzë italiane nga Latina dhe dy persona të tjerë.
Makina kishte ndaluar në zonën e Rivazzurra të Rimini dhe kjo gjë ngjalli dyshimet e policisë.
Por këto dyshime u shtuan nga një aromë e fortë hudhre brenda makinës. Nga kontrolli i policisë u zbulua se hudhrat e njoma ishin futur në makinë për të mbuluar aromën e marijuanës.
Kështu kur policia kërkoi të dinte çfarë kishte në mjet, shqiptari dorëzoi një pako të mbështjellë me celofan me rreth 50 gramë marijuanë.
Ai deklaroi se e kishte blerë pasdite, por nga kontrolli në mjet, poshtë tapicerisë së pasagjerit u gjet edhe 100 gramë marijuanë.
Kjo bëri që shqiptari të arrestohet nga policia, ndërkohë që hetimet ndaj tij janë në vijim.
