Aktorja e mirënjohur e skenës dhe Teatrit shqiptar, Margarita Xhepa, pritet të dalë nga spitali.
Spitali privat Hygeia bën me dije se pas një ndërhyrje në këmbë, të realizuar me sukses nga mjeku ortoped Dr.Ergys Cami, tashmë e madhja Margarita Xhepa gëzon shëndet të plotë.
Kostot e operacionit të aktores së madhe i mbuloi Bashkia e Tiranës.
“Unë do të festoj largimin e dhimbjeve, që më kanë lodhur prej vitesh, suksesin e operacionit dhe të gjitha bashkë, do t’i mbledhim në festën e 85-vjetorit të lindjes, që nuk është larg”, tha aktorja disa javë më parë.
Në fakt, kjo mbretëreshë e teatrit dhe e filmit e meriton një festë ashtu siç i ka hije.
Gjatë ditës së sotme artisten e njohur e ka vizituar edhe presidenti i Republikës Ilir Meta i cili i ka dhuruar dhe një buqetë me lule dhe i ka uruar shërim të shpejtë.
“Shumë pranvera të tjera të lumtura për yllin e kinematografisë shqiptare, të papërsëritshmen, Margarita Xhepa. I uroj shërim të shpejtë, besimplotë se do ta shohim sërish në skenë me të tjera role, që do t’i shtojnë freskinë buqetës së saj të jashtëzakonshme artistike”, shprehet Meta.
g.kosovari
