Policia maqedonase përdori gaz lotsjellës dhe granata defensive kundër qindra migrantëve që protestonin përgjatë kufirit greko-maqedonas, tre ditë pas incidenteve të dhunshme të regjistruara në të njëjtën zonë, raportoi media.
“Përdorimi i gazit lotsjellës ishte i pashmangshëm, pasi migrantët të cilët po protestonin për hapjen e kufirit, nisën të dëmtonin barrierën me tela me gjemba në kufi”, sipas së njëjtit burim.
Disa metra më tutje po zhvillonte një vizitë zyrtare në qendrën pritëse për refugjatët në Gevgelije, pjesa maqedonase, presidenti maqedonas Gjorge Ivanov dhe homologët e tij kroatë dhe sllovenë, Kolinda Grabar Kitarovic dhe Borut Pahor.
Me fillimin e trazirave në orët e para të paraditës, rreth dyzet forca të policisë greke u vendosën në gadishmëri midis pengesës me tela me gjemba dhe migrantëve duke shmangur në këtë mënyrë përdorimin e gazit lotsjellës. Megjithë forcat e shtuara të rendit migrantët vijojnë ende protestat.
