Ministri i Shëndetësisë në Maqedoninë e Veriut, Venko Filipçe, ka rekomanduar ndalimin dhe kufizimin e tubimeve publike masive, si pasojë e frikës nga përhapja e koronavirusit.
Kjo nismë sipas tij i është dërguar Qeverisë si masë që është në përputhje me Ligjin për sëmundjet ngjitëse, dhe pritet të shqyrtohet shumë shpejt.
Sipas ministrit Filipçe, kjo masë do të zgjasë një javë, dhe më pas Ministria e Shëndetësisë do të sjellë një vendim plotësues. Ministri deklaroi se nëse do të jetë e nevojshme, mund të zgjatet afati i një nisme të tillë.
Nëse ajo vihet në fuqi, atëherë do të ndalohen karnavalet në Strumicë dhe Prilep, por edhe mitingjet e partive politike.
Dy ditë më parë, mjekët në Shkup konstatuan rastin e parë të koronavirusit në Maqedoni. Bëhet fjalë për një 50-vjeçare që kishte qenë në Itali, e cila është vendosur me shpejtësi në karantinë.
Por ndërkohë që Maqedonia e Veriut merr masa të tilla në mbrojtje të qytetarëve, Presidenti i Shqipërisë Ilir Meta bën të kundërtën, duke i ftuar qytetarët t’i bashkohen në tubimin e 2 marsit.
