Qeveria e Maqedonisë së Veriut, me rekomandim të Komisionit për Sëmundje Ngjitëse, i ka dhënë “dritë jeshile” vazhdimit edhe për dy javë të orës policore. Deri më 6 Prill do të jetë në fuqi kufizimi i lëvizjes nga ora 22:00 e mbrëmjes deri ora 05:00 të mëngjesit.
Kjo masë, sipas autoriteteve, është marrë për shkak të shifrave në rritje të infektimeve të reja, por edhe të të shtruarve nëpër spitalet Covid të vendit.
Ministria e Shëndetësisë, gjatë ditës ka njoftuar për 1.315 pacientë të shtruar nëpër qendrat Covid të Shkupit dhe qyteteve të tjera, kurse njoftohet se ka rreth 340 shtretër të lirë. Për shkak të mbushjes së kapaciteteve spitalore, shumë klinika në spitalin e Shkupit tashmë janë shndërruar në qendrat Covid.
Presidenti i Maqedonisë së Veriut, Stevo Pendarovski, i cili ka asistuar në një mbledhje të Shtabit Kryesor të Krizës, nuk ka përjashtuar mundësinë e rivendosjes së masave tjera shtrënguese, nëse situata epidemiologjike vazhdon të përkeqësohet. Një gjë të tillë e kishte paralajmëruar kohë më parë edhe ministri i Shëndetësisë, Venko Filipçe.
Që nga fillimi i epidemisë, numri i infektimeve me COVID-19, në Maqedoninë e Veriut i afrohet shifrës prej 120.000. Për momentin janë mbi 15.000 raste aktive, kurse deri më tani betejën me koronavirusin e kanë humbur afër 3.500 pacientë.
/a.r
