Ndryshimet kushtetuese të miratuara në Kuvendin e Maqedonisë janë përshëndetur edhe nga ministri i Punëve të Jashtme, Ditmir Bushati. Në një status në Twitter, Bushati ka kujtuar një shprehje të Nelson Mandela-s që thotë: “Duket e pamundur, deri sa arrihet”.
Sipas Bushatit ky votim është një hap i madh drejt marrëveshjes së Prespës.
“Mandela thoshte “Duket e pamundur derisa diçka arrihet”. Vota për ndryshimet kushtetuese në Parlamentin e Maqedonisë sjell një hap të madh drejt implementimit të marrëveshjes së Prespës. Një demonstrim i qartë i hapjes së rrugëve drejt NATO e BE,” shkruan Bushati.
Kuvendi i Maqedonisë ka miratuar me 80 vota pro nismën për ndryshimet kushtetuese duke i hapur rrugë ndryshimit të emrit nga Republika e Maqedonisë në Republika e Maqedonisë së Veriut.
Me votimin e nismës qeveria fitoi 15 ditë për të përgatitur amendamentet dhe për t’i kthyer sërish në procedurë parlamentare.
ma.me
