Në mesnatën e 11-12 Majit, skadon afati për dorëzimin e listave të kandidatëve për deputetë nga partitë politike në KSHZ.
Nëse nuk mbërrin asnjë listë, Komisioni duhet të konstatojë këtë dhe të informojë Kuvendin. Se çfarë do të ndodhë më tej nuk është parashikuar në Kodin Zgjedhor, referon Koha.
Deri tani vetëm një parti minore Lëvizja Popullore e Maqedonisë ka lajmëruar se do të dorëzojë listat. Por nga ana tjetër, asnjë parti opozitare nuk do ta bëjë këtë si LSDM, PDSH, partitë e tjera më të vogla opozitare, por edhe BDI.
Edhe VMRO-DPMNE pritet të mos dorëzojë lista, pasi që siç mësohet po zhvillohen komunikime intensive për gjetjen e një kompromisi, me gjasë për të shlyer zgjedhjet.
KSHZ, pak orë më parë, shqyrtoi regjistrin e MPB-së për shtetasit e Maqedonisë, ku shihet se ka rritje të numrit të qytetarëve me të drejtë vote, gjegjësisht 1.958.844 votues. Mbi 6.686 janë evidentuar nga diaspora për të shfrytëzuar të drejtën e votës. (b.an)
