Trafiku në rrugët e Tiranës është padyshim një fenomen stresues. E ajo që e bën edhe me shumë të tillë, janë shkeljet e rregullave të qarkullimit nga disa shoferë. Kur vjen puna tek këta të fundit, policia rrugore e Tiranës nuk e kursen ‘dorën’, duke i gjobitur.
Teksa shpërndan këtë video, ku sjell disa shoferë të cilët kryejnë kalim të menjëhershëm nga një korsi në tjetrën pa u pozicionuar në fillim, policia thekson se kjo manovër jo vetëm shkel rregullat, por ve në rrezik edhe qytetarët e tjerë.
“Vëmendje të gjithë drejtuesit e mjeteve! Së fundmi, kemi konstatuar disa shkelje të Kodit Rrugor, veçanërisht drejtuesit e mjeteve që kryejnë kalim të menjëhershëm nga një korsi në tjetrën, pa u pozicionuar në fillim, në kundërshtim me Nenin 174.2.b. Kjo manovër e rrezikshme jo vetëm që shkel rregullat, por vendos në rrezik të gjithë përdoruesit e rrugës. Për të ndërgjegjësuar dhe parandaluar këto sjellje në të ardhmen, do të ndajmë pamje filmike të këtyre shkeljeve në rrjetet tona sociale. Ju lutemi, qëndroni të vëmendshëm dhe respektoni rregullat e trafikut për një udhëtim më të sigurtë për të gjithë”, thuhet në njoftimin e policisë.
/a.r
