Nëse Gjykata Kushtetuese do të merrte një vendim për të pezulluar “Ligjin për Pronat”, ky do të ishte “një vendim katastrofik”. Ky ka qenë qëndrimi i ministrit të Drejtësis, Ylli Manjani, në lidhje me ankimimin që Presidenti i Republikës, Bujar Nishani, ka bërë në Gjykatën Kushtetuese, kundër ligjit të pronave. Sipas Manjanit, gjykimi kushtetues është një gjykim kompleks, i vështirë dhe do kërkojë kohë.
“Masa e pezullimit do ishte e pavend. Një vendim i tillë do të bllokonte 25 milion dollarë fond kompensimi për ish- pronarët, do të bllokonte mijëra hektarë tokë për kompensim, do të bllokonte shqyrtimin e mijëra dosjeve. Nëse do të merrej një vendim për pezullim do të sillte një ngërç. Pork jo nuk është thjeshtë çështje e qeverisë, por e shoqërisë”, ka theksuar Manjani.
Sipas tij, pezullimi do të ishte katastrofik, pasi nuk ka asnjë rresht në Kushtetitë që të bllokojë zbatimin e ligjit dhe të akteve, vetëm kur ato janë në kushte ekstreme.
“Gjykata Kushtetuese nuk ka asnjë të drejtë që të pezullojë aktet e shtetit shqiptarë. Ky nuk është rast ekstrem, por normal, ndaj ska pse të merren vendime të tilla. Oferta e qeverisë është mjaft serioze. Është një ofertë që është shumë e mirë për ish pronarët, për ta nxjerrë përfundimisht kompensimin e tyre nga listat e mashtrimet elektorale të 25 viteve”, ka theksuar Manjani.
