Ministri i Drejtësisë, Ylli Manjani është në Greqi, duke marrë pjesë në Kongresin Syrisa-s. Ministri Manjani përmes një statusi në Twitter pasqyron nisjen e aktivitetit ku ai merr pjesë! “Kryeministri Cipras prezantoi programin Politik të Syriza-s sot në ditën e parë të kongresit, impresionuese”, deklaron Manjani, duke theksuar se kjo është alternativa e vërtetë e të majtës moderne. “Jetojmë në një kohë kur elitat politike në shoqërinë globale janë shkëputur ndjeshëm nga realiteti njerëzor. Shoqëria po polarizohet gjithnjë e më shumë, pavarësisht rënies së barrierave tradicionale! Mënyra më e “suksesshme” e të bërit politikë është Populizmi!
Në këto kushte reforma numër 1 duhet të jetë reforma politike. Na duhet një politikë përfaqësuese dhe jo polarizuese! Një politikë e thjeshtë dhe jo që komunikon “thjeshtë”! Një politikë që ngushton dallimet duke garantuar dinjitetin njerëzor! Bashkëpunimi dhe dialogu i përhershëm janë mjetet më të suksesshme të të bërit politikë. Vendimet konsensuale janë domosdoshmëri për rritjen e besimit tek politika. Edhe kur nuk jemi dakord, respekti për kundërshtarin është detyrë”, tha Manjani.
Ai shton se qëllimi është udhëheqja e shoqërisë drejt mirëqenies. “Mirëqenia kërkon punë. Puna bën ekonominë. Detyra e politikës është të krijojë klimën më të mirë të mundshme për të bërë ekonomi. Në veçanti e majta Europiane është e çoroditur dhe pa shumë alternativa. E fundit alternativë e suksesshme ishte ajo e Blair. “Aktualisht funksionon Alternativa Cipras. E majta moderne e shekullit te ri që nuk resht së mbrojturi njerëzit në nevojë dhe nuk pranon asnjë pazar me dinjitetin e njeriut! Integrimi i shtresave apo grupimeve sociale pa dallim në shoqërinë greke është filozofia politike e drejtimit aktual”, vijon Manjani.
Sipas tij, ishin këto parime e kjo filozofi, që Greqia nën drejtimin e Kryeministrit Cipras kaloi dallgën financiare më të madhe të kohës moderne! “Nuk ka përfunduar ende, por Greqia duket në rrugë të mbarë. Reforma të thella, por me dinjitet! Nxitje e bisnesit në shërbim të ekonomisë kombëtare, por trajtim dinjitoz për të varfrit dhe të pamundurit! Arsim të brezit të ri nëpërmjet një politike arsimore pa diskriminim! SYRIZA një parti e re për tu marrë shembull! Alternativë reale e të majtës moderne.”, shkruan ai.
ma.me
