Ministri Manjani ka vazhduar kritikat e tij ndaj gjyqësorit, teksa foli në analizën e Gjykatës së Krimeve të Rënda për vitin e shkuar.
Manjani Ylli Duke folur për reformën në Drejtësi, Manjani kujtoi se Gjykata e Krimeve të Rënda është krijuar gjatë vitit të mbrapshtë 1997.
Ai shtoi se falë punës së këtyre gjyqtarëve që kanë futur në burg banda të rrezikshme kriminale, tashmë janë të detyruar të lëvizin me truproja.
“Ajo që ne na ka dhënë kredo shtetformuese është Gjykata e Krimeve të Rënda. Në momentin që u krijua Gjykata e Krimeve të Rënda ishte një moment kur popullsia ishte e armatosur, bandat shëtisnin rrugëve dhe sistemi gjyqësor normal nuk i përgjigjej.
Sot kemi banditë në burg, banda të shkatërruara dhe kjo punë nuk është bërë pa kontributin tuaj të përditshëm, pa mundin tuaj, që disa prej jush ngrihen në mëngjes dhe shoqërohen nga badigardë”, tha ndër të tjera ministri i Drejtësisë.
Manjani theksoi se reforma në drejtësi duhet të bëhet patjetër si kushti kryesor për t’u anëtarësuar në Bashkimin Europian. Ministri vlerësoi punën e gjyqtarëve të këtij institucioni dhe u shpreh se “nuk ka shumë ankesa për Gjykatën e Krimeve të Rënda”.
Kurse, kreu i kësaj Gjykate u shpreh kundër draftit të reformës për shkrirjen e Krimeve të Rënda, madje shtoi se duhet t’i shtohen kompetencat.
