Ministri i Drejtësisë Ylli Manjani komenton në studion e “Opinion” deklaratat e Ambasadorit Lu për gjyqtarët e korruptuar shqiptarë.
Manjani shpreh mbështetje për konstatimin e Ambasadorit, por sipas tij deklarata publike nuk mjaftojnë për ta luftuar korrupsionin. Për këtë sipas Manjanit duhen ndërtuar ligje efektive.
“Drejtësia ka ardhur në qendër të vëmendjes sepse kemi kuptuar që është hallka më e rëndësishme për të luftuar korrupsionin. Duhet sistem gjyqësor funksional. Nëse nuk kemi bërë këtë nuk kemi bërë asgjë”, shprehet Manjani.
Në studion e emisionit “Opinion”, duke folur për sistemin e drejtësisë dhe gjyaktësit e korruptuar, Ministri i Drejtësisë Manjani u shpreh se në radhë të parë duhet ndërruar sistemi. “Njerëzit janë të fundit në llogari”, u shpreh Manjani.
“Kodi penal është i pakapshëm, kemi ndërhyrje në çdo pikë të ligjit, pa sens, pa lidhje. Ligjet janë me gropa, ambiguide, në dorën e gjykatësit. Duhet një terapi antikorrupsion”.
Një nga shkaqet për të cilat drejtësia shqiptare nuk funksionon, për Ministrin e Drejtësisë Ylli Manjani, është edhe pagesa e ulët e gjyqtarëve.
“Rroga e një gjyqtari është aq sa na kushton për të mbajtur një të burgosur” u shpreh Manjani duke shtuar se rroga e gjyqtarit duhet të jetë të paktën 2 mijë euro.
