Kreu i Komisionit të Ligjeve, Ulsi Manja, ka hedhur dje poshtë akuzat ndaj paketës anti-KÇK. Duke folur në sallën e Parlamentit, ai tha se është një draft tërësisht kushtetues. Sipas tij, përmes kësaj pakete do u jepet një goditje e fortë peronave të lidhur me krimin.
“Janë ngritur pikëpyetje me kushtetutshmërinë e aktit normativ. Unë kam një qëndrim shumë të thjeshtë, jam pro këtij akti normativ, sepse në standardet e reformave që ka vendosur mazhoranca, ka një reformë në drejtësi dhe për gjyqtarët e prokurorët ka veting, për politikanët ka ILDKP dhe SPAK, ndërsa për të dënuarit për veprat penale të rënda do të ketë OFL. Akti normativ është një formë e deklarimit të pasurisë për personat e dënuar dhe që do të kenë barrën e provës për të provuar pasurinë e tyre dhe se vjen nga burime të ligjshme”, tha Ulsi Manja.
Më tej kreu i Komisionit të Ligjeve u garantoi personave “të frikësuar” nga ky akt, se miratimi i kësaj paketë nuk do të kufizojë asnjë të drejtë.
“Ky akt normativ ka trazuar ujërat e ndenjura për 30 vjet, në të gjitha sferat e jetës shoqërisë, në politik, biznes, etj, por ja që erdhëm në miratimin e këtij akti normativ. Për të gjithë ata që kanë merak se me këtë akt kufizohen disa të drejta kushtetuese të rrinë të qetë se nuk kufizohet asnjë e drejtë. Ky ligj special e justifikon nevojën që kemi. Akti ka efekte deri më 30 dhjetor 2020, por nëse efikasiteti i tij do të kërkojë ta shtyjmë përtej, pse jo Parlamenti do duhet t’ia japë këtë mundësi institucioneve për ta zbatuar deri në fund”, argumentoi Ulsi Manja.
Ai ritheksoi edhe fjalën e deklaruar nga kryeministri Rama dhe ministri Sandër Lleshaj, që njerëzit e thjeshtë nuk do të goditen nga OFL.
“Me këtë akt nuk goditen gjithë qytetarët, ata të rrinë të qetë, subjekte do të jenë vetëm personat e dënuar brenda dhe jashtë vendit për veprat krim i organizuar, krime të rënda, aktivitete terroriste, apo subjekte që financojnë terrorizmin. Ndërsa për qytetarët do të ketë amnisti fiskale”, tha Manja.
/a.r
