Gjykata Kushtetuese ka pranuar kërkesën e PD për të shqyrtuar papajtueshmërinë e mandatit të deputetit socialist Koço Kokëdhima, dhe mbi këtë ka vendosur datën 23 nëntor, si ditën kur do të mbahet seanca e rradhës, pas asaj të sotshme.
“Gjykata vendosi që ta pranojë kërkesën për të marrë pjesë si subjekt i interesuar deputeti Koço Kokëdhima në seancë dhe të shtyjë seancën gjyqësore me datë 23 Nëntor ditë e Hënë ora 10:00” – tha kryetari Bashkim Dedja.
Avokati i deputetit Kokëdhima kërkoi që në seancën e rradhës, muajin e ardhshëm, të jetë i pranishëm edhe vetë socialisti, një kërkesë që u kundërshtua në fakt nga përfaqësuersi ligjor i PD, avokati Ivi Kaso.
“Deputeti Koço Kokëdhima është kërkuar me kërkesë drejtuar kësaj gjykate që të marrë pjesë në gjykimin kushtetues me cilësinë e subjektit të interesuar”- tha avokati i deputetit.
“ Për sa kohë Kuvendi i Shqipërisë është i përfaqësuar dhe mbi të gjitha për sa kohë objekti kryesor i kërkesës tonë është kundërshtimi i vendimarrjes abuzive të Kuvendit të Shqipërisë çmojmë se nuk janë rrethanat për të pranuar dhe palë të tjera të interesuara”, – tha avokati Kaso.
Partia Demokratike iu drejtua Gjykatës Kushtetuese në korrik të këtij viti, me argumentin se deputeti socialist në kohën e ushtrimit të mandatit të tij ka përfituar tendera publikë përmes firmës ku kishteë shumicën e aksioneve në pronësi të tij. Në atë kohë, deputeti socialist Koço Kokëdhima sqaroi se në çastin e marrjes së mandatit të deputetit nga ana e tij, ai kishte shitur aksionet në firmën në fjalë. Cështja shkoi në Kuvend, dhe përmes votimit legjilativi vendosi që cështja të mos shqyrtohej. Në nenin 70 të kushtetutës parashikohet që deputetët nuk mund të kryejnë apo të kenë në zotërim biznese ose veprimtari tjera fitimprurëse përveç pagës së tyre si të zgjedhur.
