Arben Ristani duket se ka bërë një prapaktheu të fortë për cështjen e mandatit të Mark Frrokut.
E ndërsa në Këshillin e Imuniteteve dhe Rregullores, Ristani votoi pro që cështja e mandatit të Frrokut t’i drejtohej për interpretim Gjykatës Kushtetuese, në seancën e sotme plenare ka kërkuar që sot të votohej në parlament heqja e mandatit më pas Kushtetuesja të shprehej.
E të njëjtit mendim ka qenë edhe Jozefina Topalli.
“Kush është dakord me avokatin e Frrokut le të firmosë së sebashku me 27 deputetë dhe t’i drejtohen Kushtetueses.
Ne duam të votojmë heqjen e mandatit”tha Topalli. Ndërsa Ristanit dhe Topallit iu përgjigj Gramoz Ruci.
Vaj medet me këtë opozitë. Vaj medet se dëgjova përfaqësuesin e opozitës që është në Komisionin e Mandateve.
Dëgjova edhe parafolësen që është kundër. Po kë të besoj, përfaqësuesin legjitim në Komisionin e mandateve, që janë të gjithë legjitim të cilët me emër janë shprehur, zoti Ristani, citoj: Mua më duket shumë e arsyeshme dhe jam dakord që t’i drejtohemi Gjykatës Kushtetuese.
Ky është një precedent, t’i drejtohemi Gjykatës Kushtetuese. Më fal zoti Ristani, por andej nga jeni ju dhe unë, ka një shprehje që: “Qeni i rrahur që kulish nuk bëhet qen stani. Të kanë rrahur si kulish”.
Batutës së Rucit iu përgjigj Ristani “Kam mësuar se jo çdo qeni duhet t’i biesh me gurë”.
Kreu i grupit të PD, Paloka replikoi me Rucin duke u shprehur se :”Ne jemi për mbarimin e mandatit të Mark Frrokut. Këmbëngulja jonë është që të votohet kërkesa e Grupit parlamentar të Partisë Demokratike, për mbarimin e mandatit.
Ajo që keni ju për votim nuk ka të bëjë fare me Gjykatën Kushtetuese. Prandaj, kërkojmë pesë minuta pushim për projektvendimin tjetër”tha ai.
Ish-kryetarja e Kuvendit, Topalli këmbënguli edhe njëherë që “Nuk hidhet në votim një raport që nuk thotë asgjë. Ka një kërkesë me shkrim, ajo përkthehet në një projektvendim. Ju mbroni avokatin e zotit Mark Frroku, por ne kemi vendimin tonë”.
Ndërsa kreu i Kuvendit, Meta u shpreh se inciativa për mbledhjen e Këshillit të Mandateve është bërë nga ana e tij, më pas erdhi kërkesa nga Ristani.
“Ishim përpara një rasti të paprecedent. Jemi përpara një rasti që të mos shërbejë si precendent, prandaj ia dërguam Kushtetueses. Prandaj duhet të shpreheni me votë”tha Meta.
Nga votimi 74 ishin pro procesverbalit të Këshillit të Mandateve dhe Imuniteteve që cështja e Mark Frrokut të dërgohet për interpretim në Kushtetuese.
Ndërsa opozita ka braktisur sallën e Kuvendit për shkak të përplasjes për mandatin e Frrokut.
