Bordi drejtues i Manchester United do të vazhdojë ta mbështesë trajnerin e skuadrës, Jose Mourinhos, përkundër humbjes me rezultat 3-0 kundër Tottenhamit, pasi që ata ishin të kënaqur me performancën e “Djajve të kuq” në pjesën e parë të ndeshjes, raporton The Guardian.
Unitedi e humbi ndeshjen e dyte radhazi mbrëmjen e së hënës në Old Trafford. Ata humbën me rezultat 3-0 kundër Tottenhamit në shtëpi. Klubi londinez i shënoi që të tri golat në pjesën e dytë të ndeshjes, njëra u shënua nga Harry Kane, ndërsa dy të tjerat nga Lucas Moura, përcjell Gazeta Express.
Megjithatë, skuadra e Jose Mourinhos ishin mjaft të mirë në pjesën e parë të ndeshjes. Strategu portugez e kishte ndryshuar plotësisht formacionin e ndeshjes, dhe kishte zgjedhur të luante me formacionin 3-3-3-1, në të cilën Herrera, mesfushor defansiv, luante në pozitën e mbrojtësit të krahut të djathtë.
Përkundër faktit që ndeshja përfundoi pa gola në pjesën e parë, Unitedi pati shumë mundësi për të shënuar gol. Rasti më i mirë ishte ai i Romelu Lukakus, i cili nuk arriti të shënojë në portën e zbrazur, pasi e kishte kaluar portierin e Tottenhamit, Hugo Lloris.
Pas humbjes kundër Brightonit javën e kaluar, përgjigja e Mourinhos, sa i përket performancës së skuadrës, ishte mjaftueshëm e mirë për bordin drejtues, dhe për këtë arsye ata nuk dëshirojnë ta shkarkojnë portugezin.Skuadra e Mourinhos do të përballet me atë të Burnleyt të dielën dhe pastaj do te ketë një pushim të shkurtë për shkak të ndeshjeve të Kombëtareve. Nëse nuk ndodh asgjë e tmerrshme gjatë kësaj kohe, Mourinho nuk pritet të shkarkohet, përgatiti ”Gazeta Express”. (b.an)
