Ministrja e Shëndetësisë, Ogerta Manastirliu është shprehur se nuk ka emergjencë të largimit të infermierëve në Shqipëri.
E ftuar në studion e RTV Ora, Manastirliu tha se fenomeni i largimit të infermierëve nuk është vetëm shqiptar, por ka prekur edhe vende të tjera të botës.
“Nuk është fenomen shqiptar. Ka prekur shumë vende të botës, të rajonit e vendet evropiane.
Kam dëgjuar ditët e fundit disa të dhëna për largimet masive të infermierëve nuk rezultojnë të jenë të vërteta, të paktën sipas shifrave që disponon Ministria e Shëndetësisë. Jo se nuk ka largime apo infermierë që bëjnë kurset e gjuhëve dhe më pas largohen për të provuar veten në një vend tjetër”, tha Manastirliu.
Ministrja tha se 70% e barnave që hyjnë në Shqipëri janë nga Komunitetit Evropian dhe plotësojnë të gjitha standardet e cilësisë.
“Jemi duke marrë masa që në Agjencinë e Kontrollit të Barnave të ndërtojmë dy laboratorë. Sot ka një laborator, i cili bën një gamë analizash për barnat, sepse barnat kur vijnë në territorin e Shqipërisë kanë disa certifikata. 70% e barnave që hyjnë në Shqipëri janë nga Komunitetit Evropian. Barnat që vijnë në Shqipëri plotësojnë standardet e cilësisë, kanë një seri kriteresh kur futen në Shqipëri. Kontrollohen nga Agjencia Kombëtare e Barnave dhe i nënshtrohen një serie ekzaminimesh. Ne jemi duke ndërtuar 2 laboratorë që vitin tjetër përfundojnë, ku hapim gamën e analizave të barnave. Ajo që jemi duke realizuar dhe bëjmë ditë për ditë është kontrolli rigoroz në farmaci, që farmacitë të plotësojnë të gjitha kushtet, në depot farmaceutike që të plotësojnë të gjitha kushtet, frigoriferike apo të magazinimit që cilësia dhe efikasitet mos cënojë shëndetin e qytetarëve”, tha Manastirliu.
g.kosovari
